Omini e fimmini, vi raccumannu di stari attenti a lu mé cumannu e stati attenti a nun sbagghiari, mala fiura unn`amu a fari. Vi raccumannu na cosa cchiù bedda, di rispittari la fimminedda. Lei, prufissuri,, ci accuminciassi, nui semu pronti a tutti li passi. Li cavaleri tutti anavàn, facemu a li dami un compliman mentri pirmetti chista sirata `a dama a bracciu e a caminata, facemu rollo pi dui minuti omini e fimmini cu i manu unciuti a la riversa giramu anticchedda senza taliari la cchiù bedda. Ora sintiti a me pinzata, facemu n`anticchia di caminata. I dami arrestanu tutti a na banna, l`omini seguinu a cu cumanna, i cavaleri senza baccanu appressu di mia battiti li manu. Viautri fimmini si un vi siddìa un dietru front pi curtisia ora viremu si n`arrinesci fari tanticchia di trasi e nesci. Nu trasi e nesci boni ci emu, vi raccumannu `un ni cunfunnemu man manu chi ni ramu a manu `un ni salutamu pirchì arrera n`incuntramu. Quannu arrivamu na nostra dama facemu attenzioni a chiddu chi chiama ora cuntinuamu sta caminata, ma la facemu cu li vrazza `ncruciati e facemu un zighete zaghete e zighete zaghete e zighete zaghete e faciti tutti comu fici iu mittemu la dama davanti pi curtisia, ora facemu lu pirulé a dama davanti purtamu darré e continuamu senza sbagghiari un pirulé n`avemu a fari, un pirulé facemu a l`istant purtamu di darré la dama davant. Prima chi cancia sta sunata facemu n`autru pezzu di canminata, li dami restanu tutti a `na banna l`omini seguinu a cu cumanna. Li cavaleri senza sbagghiari davanti i fimmini s`annu a firriari, vuiautri fimmini cu l`occhiu fissu fronti a naiutri faciti li stissu, aisamu i manu e pi curtisia formannu prestu na galleria, ora viniti appressu di mia, boni ci emu na galleria. Basta chi nuddu si gilusia vi dicu a tutti picciotti strincemu, ma stamu attenti a soccu facemu. Ora canciamu la carreggiata a dama a bracciu e a caminata, la caminata sta pì abaccari, la cuntraranza già terminò, masculi e fimmini carmativi un po`.
|
|