A li stremi e li fridduri jetta Cesari lu bannu ricchi e poveri, signuri, tutti a scriviri si vannu
ritornello: Susi, pasturi, nun dormiri cchiù nun viri cch`è natu ‘u bamminu Gesù?
E ognunu o so’ cumannu ubbidienti si trovava Betlemme e tutti quanti unni Cesari abitava
ritornello
Maria Santa si trovava cu Giuseppi in compagnia, ‘u so’ viaggiu cuntimplava ca hav’affari tanta via
ritornello
San Giuseppi ci dicia: Spusa, a li me’ parenti farà tanta curtisia lu rizzettu e l’alimenti
ritornello
Si partìu tuttu cuntentu ‘a so’ spusa si purtau tucculiannu furtimenti quannu subitu arrivau
ritornello
I so’ parenti s’affaccianu e lu vistinu in puvirtà ci spianu: Chi vuliti? pirchì forti tucculiati?
Ritornello
San Giuseppi ccu umiltà ci dissi: Ju sugnu vinutu voju ca m’arrizzittati ca nun haju nuddu aiutu
ritornello
Ci fu chiddu bonu sintutu li ributta e poi li manna Nun c’è locu e mancu aiutu Jtavinni ‘a nautra banna
Ritornello
Cu havi anima e cori in pettu ci li fa li riflissioni e Maria senza rizzettu sposta ogni afflizioni
ritornello
E la gran cunfusioni San Giuseppi ca pruvau chistu mai si lu supponi ca rizzettu nun nni truvau
ritornello
San Giuseppi ci dicia: Spusa mia nun dubitari Ca l’amici e li parenti Lu rizzettu c’hanu à dari
Ritornello
Arrivati ‘nte parenti tutti stanchi, amari e afflitti, ma rizzettu nun ci fu nenti ca cci dissunu semu stritti
Ritornello
Sennu ‘mmenzu di li strati ci cumparsi un pellegrinu c’’nzignava ‘na contrada ‘na rutticedda dda’ vicinu
Ritornello
E nun era pellegrinu era ‘n angilu mannatu di l’imperu miu divinu na rutticedda c’ha ‘mparatu
Ritornello
Maria Santa si trovava a Betlemmi, a la campìa, era già arrivata l’ura ccu’ Giuseppi in compagnia
Ritornello
Li cchiù spiritosi unniputenti di lu celu poi calanu, cuncirtannu li strumenti e di la gloria cantanu
Ritornello
Li pasturi annunziare ch’era natu lu Missia, quasi tutti l’aduraru ‘nta li vrazza di Maria
Ritornello
|
|