Le poesie di Fefè |
VISIONI
DALL`ANTOLOGIA DEL PREMIO GIUSEPPE FEDELE VITALE 1992
Mi stava appinnicannu,
doppupranzu,
sutta a un pedi d`alivi.
Era jurnata di lu ferraustu
(quattru o cinc`anni fà).
Cicali murritiusi sunàvanu,
senza dàrimi abbentu,
la stissa nota
di richiamu d`amuri.
`Nta l`afa, ogni tantu,
un filiddu di ventu
m`asciucava lu suduri di `ncoddu
e annacava li pàmpini d`argentu.
Tuttu `nsèmmula
`ntisi na vuci
chi mi chiamò pi nomi.
E, comu fussi un sonnu,
vitti a na matri, bedda,
c`abbrazzava e vasava
lu so` nutricu `mbrazza
e mi ridìa.
Un pocu s`incugnò
e mi pruju a stu fìgghiu
dicennu: - Guardamillu!
Iu lu tinìa cu priu
e mentri lu taliava
iddu criscìa:
picciutteddu, picciottu
si facìa,
omu c`a varba...
`nfinu
ca mi lu vitti mòriri
`ntè vrazza,
tuttu chinu di sangu
e na firita aperta
`nta lu ciancu.
Chi stràziu `nta lu gridu ca ghittai!
... Allura li cicali si zitteru!
Pagina stampata dal sito Sicilia nel Mondo
www.sicilianelmondo.com
info@sicilianelmondo.com