Lu puparu
Fefè Vaccaro
Quannu a lu mastru chi facia li pupi
ci capitava un lignu troppu duru
diciva: "chistu è bonu pi li scupi!"
e lu jittava `nta `na gnuni `i muru.
Ma si lu lignu inveci si pristava,
ed era chidda giusta la durizza,
cu l`ascia e lu scarpeddu lu `ntagghiava
e ni faveva un`opra di biddizza.
Nascevanu accussì li paladini:
Rinaldu, Orlandu, draghi di l`infernu,
turchi, cavaddi, prìncipi e riggini.
Si `u lignu era purritu n`ta l`internu
diciva: " nun lu jiettu ca, a la fini,
ci pozzu fari un capu di guvernu!".
