La creazioni
Fefè Vaccaro
Doppu ca fici `u munnu, a lu Signuri
ci parsi cosa bona e naturali
jinchillu d`ogni speci d`erva e ciuri,
di pisci, oceddi e qualisìasi armali.
L`urtimu jornu tuttu lu so` amuri
lu didicò a `na cosa eccezionali,
ma, stancu, nun ci misi assai viguri
e `stu pupu di crita vinni mali.
Adamu, sulu, avìa malincunia,
a lu Signuri nun ci parsi umanu
e subitu pinzò p`a cumpagnia.
Sàcciu ca `un è parrari di cristianu:
... ma Iddu, chi sapìa comu finìa,
picchì nun ci livò subitu manu!?
