Omaggio a G.Schiera
Fefè Vaccaro
Rosa, siti cchiù bedda d`una fata
cu `dda vuccuzza russa e sapurita,
la peddi bianca e liscia comu sita,
la genti chi talìa resta `ncantata.
Quannu vi viju passari pi `sta strata
`nto pettu mi si grapi una firita
e, giuru, ca vi dassi la me vita
pi avìrivi cu mia `na matinata.
Ma `nta `na cosa fu `a natura ingrata:
ca vi fici lu cori comu crita
e un mi dignati di `na taliata.
E iu chi v`haiu addisiatu cumu zita,
restu cu la mirudda scumminata
e, sempri sulu, fazzu lu `rimita!
