O` cimiteru
Fefè Vaccaro
Quannu, p`i morti, vaiu o` cimiteru
ci portu quattru ciuri a li parenti,
comu pi diri ca, cu lu pinseru,
ancora sunnu vivi `nta la menti.
Caminu silinziusu pi un sinteru
e, quasi quasi, sentu li lamenti
di chiddi chi `nta vita, pi daveru,
camparu senza aviri `u restu `i nenti.
Ci sunnu sipulturi `nghirlandati,
àvutri cu i balati tutti torti,
senza mancu dui ciuri spampinati.
Dunca, mi dicu, puru doppu morti,
infinu ca nun s`è risuscitati,
s`hannu a subiri sempri cosi storti!
