Paisani luntani - Michelangelo Balistreri
Fu lu travagghiu
a spartiri la matri da lu figghiu
a fari addivintari u cori `na valigia
inchennula di sonna e di spiranzi.
E fu L`America la calamita
ca cu li so ricchizzi si purtò luntanu
cuntavanu u ritornu `nne idita dina manu
ma annu doppu annu ci passaru a vita.
E foru l`occhi `ntall`urtima vasata
ca si stamparu lu paisi dintra a lu cori stancu
addinucchiati e pedi di l`Addulurata
cu l`urtima prighiera
incheru li vapura chini di chiantu.
Passo` lu tempu
ma è sempri comu u primu jornu
e quantu voti a notti
stanchi di lu travagghiu
si susinu `nfilati dintra un sonnu
cu li finestri aperti
e l`occhi sbarrachiati o novu munnu
cercanu lu paisi
li varchi, li strati
anticchia di scogghiu
e l`occhi di `na matri
ca chiu` luntana
ancora aspetta o figghiu.
