Lu casatu
Fefè Vaccaro
Me nannu havìa truvatu,
`nmenzu a li carti antichi,
lu stemma d`u casatu:
`nto` scutu un pratu virdi
cu a centru un arbulìcchiu
chi havìa, supra a lu truncu,
un serpi `nturciuniatu.
Ristò accussì `ntrunatu
pi chista ritruvata,
antica nubiltà,
chi addivintò cchiù stranu:
di tannu, pi salutu,
vulìa vasata `a manu!
Muriù mentri dicìa,
chiancennu, a li parenti:
chi fuvu sfurtunatu!
Campavu tutta `a vita
sempri misu di latu,
mentr`era quasi prìncipi
e `un ni sapeva nenti!
