La lussuria (dai Vizi capitali)
Fefè Vaccaro
Don Cicciuzzu, lu tignusu,
havi quasi sittant`anni.
Totalmenti è fori usu
pi l`acciacchi e li malanni.
Ma la testa ci fa diri
c`a li fìmmini è piacenti;
puru si sta pi muriri,
puru s`iddu è senza denti!
La matina s`imprufuma,
si talìa a lu specchiu e dici:
- Chista carni chi mi fuma
di natura è cacciatrici! -
... La pinzioni la cunsuma
ni Tanuzza, `a miritrici!
