La pinnula
Fefè Vaccaro
M`aveva scrittu u medicu,
picchì sugnu nirbusu,
una partita `i pìnnuli
cu l`istruzioni d`usu.
Ma in farmacia mi dèttiru,
pi sbagghiu, iu suspettu,
cu a scritta "made in USA",
di pìnnuli un tubettu.
Mi cunsumai! Sta pìnnula
mi duna la visioni
di provocanti fìmmini
cu milli tintazioni.
A la tivvù, a svagarimi,
mi staiu na para d`uri:
è antica, in biancu e nivuru,
però la viu a culuri!
Puru a prisintatrici
(affàbili signura),
darreri a lu micròfonu
completamenti è nura!
Visti li risultati,
mi lèggiu l`istruzioni...
mi vennu i quaranati,
tricentu di prissioni!
Autru chi calmanti!
La pìnnula sirvìa
pi cu è troppu... calmu!
Insumma no pi mia!
Indietro
Powered by