La fidi e la cultura
Fefè Vaccaro
Mi dissi un gran pueta populari
ca `i casi senza libra sunnu staddi,
ch`è la cultura chi fa addivintari
òmini cu lu sennu e cu li baddi.
Arrispunnivu: `Gnaziu nun babbiari...,
quantu ci nn`è chi càlanu li spaddi
tant`anni supra a `i libbra pi studiari,
e arrèstanu lu stissu pappagaddi!
Me nanna, chi mischina, era `gnuranti
però di l`omu cumprinnìa lu mali,
prigava tuttu u jornu a Diu e a li santi
E mi `nsignò: - La vita nenti vali
si a` sira ti vai a curchi,comu a tanti,
senza un pinzeru a Diu...,comu n`armali
Indietro
Powered by