Lacrimi di cuccudrigghiu
Fefè Vaccaro
O` Pipiritu c`era un cuccudrìgghiu,
àvidu e sanguinàriu senza eguali,
tantu ca,`nmenzu a tutti l`àutri armali,
si capitava s`agghiutteva a un figghiu.
Diciva la muggheri, c`un bisbìgghiu:
- Stu chiantu chi fà doppu nenti vali,
è sulu picchì addiggirisci mali
ca `st`ùmitu ci sgurga di lu cìgghiu! -
`N Sicilia quantu sunnu `i funerali
e li balati misi pi cunsìgghiu
d`autorità e guvernu regiunali?
La genti ormai lu sapi: su` signali
di mala digistioni e di sbadìgghiu;
Lacrimi `i cuccudrìgghiu tali e quali!
Indietro
Powered by