Regula murali p`i latri
Fefè Vaccaro
Un picciutteddu, latru di natura,
avennu latru `u patri e puru `u nannu,
fu cunnannatu d`a magistratura
picchì dintra a un jiardinu fici dannu.
`Nfatti, doppu furzata `a sirratura,
s`avìa futtutu, calmu e senza affannu,
un gaddu e tri gaddini di figura,
c`ora unni sunnu ova chiù nun fannu.
`Nveci, p`un onorévuli impurtanti
ca,`ntempu nenti, si futtìu miliardi,
ci fu la priscrizioni, grazi a `i santi,
a l`avvucati e a tutti li ritardi.
E` chista la murali: è un lestufanti
cu arrobba picca, e `un mèrita riguardi!
