Frumentu
di Oreste Reale
Comu l’unna si movi
lu mari d’erba ‘nfucata e cimiddìa.
Acchiana pi l’aria nu diliriu
di griddi e di cicali,
e ‘ntrona lu rospu ca s’addurmisci,
supra na pampina ‘ntra la ripa e l’acqua.
Mari di pratu e fraschi
c’hannu di l’omu li culura.
Rispittusa la spica ‘ncurunata,
cala la testa a la so matri terra
e, ‘ntra nu ruppu e l’autru,
la canna vacanti sona
a la carizza di lu ventu maiulinu.
La lunguledda sbatti e stenni la manu
p’acchiappari na nota di frischittu
ca pi l’aria va’ circannu la calura.
Aspettanu la fauci li spicuzzi
cu li capiddi bruni a ventu a ventu.
Lu suli, l’acqua, lu surcu di viddanu,
ficiru nasciri, di la terra arsa,
la carni di nostru Signuri.
E la spica si ruculia
comu na bedda figghia
cu lu spènsiri novu
davanti a lu specchiu.
Poi, a la sira lu ramu siccu
si smarina e pensa
ca a ghiornu addiventa frumentu
e poi farina e poi supra la mensa,
Ostia saramintata.
