da VIVA MARIA (I Misteri del Rosario)
Edizioni del Pitrè 1989
Misteri gaudiusi
I - L`ANNUNCIAZIONI DI L`ANCILU
Elisabetta era o` sestu misi
quannu Gabrieli Arcàncilu vinìa
pi annunziari a la Vìrgini Maria:
- La Grazia d`u Signuri è supra `i Tia. -
Quannu a Madonna sti paroli `ntisi,
scantata dumannò chi vulìa diri.
L`Ancilu dissi: - Fìmmina `un timiri,
Gesù, figghiu di Diu ha` cuncipiri. -
- Ma nun canùsciu a nuddu omu, iu!
Comu sarrà ca mi succedi chistu...? -
- Cosa nun c`è chi nun po` fari Diu,
sarrai virgini e matri `i Gesù Cristu! -
- Eccu, la serva d`u Signuri è ccà,
sia fatta la so` santa vulunta! -
II - LA VISITA A SANTA ELISABETTA
Doppu `na pocu `i jorna di viaggiari,
trasìu Maria `nt`a casa `i Zaccaria;
Elisabetta, so` cucina, avìa
`nt`o ventri u pricursuri d`u Missia.
Appena ca si `ntisi salutari
Elisabetta si jinchìu d`Amuri:
- Oh, picchì mai la Matri d`u Signuri
veni a` me casa a fàrimi st`onuri?
Biniditta sì tu, cucina mia,
e binidittu u to` cuncipimentu,
biniditta picchì la prufizia
cu la to` fidi arriva a cumpimentu! -
- L`anima mia a lu Signuri è grata...
st`umili serva d`ora in poi è biata! -
III - LA NASCITA DI GESU` A BETLEMMI
Pi òrdini di Augustu Imperaturi
fu fattu un cinsimentu in Palistina;
Giuseppi, cu la spusa pilligrina,
pi Betlemmi prestu si `ncamina.
Pi a matri, `ncinta di lu Redenturi,
un fu truvatu un dignu alloggiamentu,
intentu si cumpeva lu mumentu
di lu Natali, lu cchiù granni eventu!
Appena vitti a luci la Criatura,
figghiu d`u Patri Eternu è ùnica cosa,
vinni pusatu `nta na manciatura:
l`Amuri a` puvirtà subitu sposa!
`Nt`a naca cu la pagghia c`è a sarvizza
d`un munnu ancora in cerca di ricchizza!
IV - LA PRISINTAZIONI O` TEMPIU
Comu la liggi antica stabileva
fu tempu di la purificazioni,
Maria e Giuseppi, cu gran divuzioni
dannu a Gesù `nt`e vrazza a Simeoni.
Lu santu di Gesù l`occhi nun leva
pi chiddu c`avìa avutu rivilatu;
ringrazia a Diu c`aveva priparatu
stu faru `i luci eterna pi u Criatu:
- Ora Signuri c`o` to` servituri,
secunnu quali fu la to` parola,
vitti cu l`occhi so` lu Salvaturi,
arricògghiti st`arma chi a Tia vola.
Maria, pi tu capiri, biniditta,
un ghiornu avirrai l`anima trafitta! -
V - LU RITROVAMENTU DI GESU`
Comu pi a Pasqua Ebrea s`usava fari,
a lu Signuri si rinneva omaggiu
e a Gerusalemmi lu viaggiu
faceva ognunu pi pilligrinaggiu.
Maria e Giuseppi, `nta lu riturnari,
circàvanu a Gesù `nmenzu a i parenti,
ma nuddu ci sapeva diri nenti:::
A` Cità Santa tòrnanu sgumenti.
Doppu tri ghiorna, `nfini, lu truvaru
o` Tempiu ca parrava cu i Duttura:
- Figghiu di lu me cori, figghiu caru,
picchì ni prucurasti sti dulura?! -
- Ancora nun capìstivu ca iu
hè fari i cosi di lu Patri miu?! _
