da Viva Maria ed. del Pitrè 1989
MISTERI GLORIUSI
I - LA RESURREZIONI
Era lu primu jornu d`a simana,
accussì prestu ca `un avìa agghiurnatu:
quannu vitti u pitruni arruzzulatu
ristò la Maddalena senza ciatu.
Torna n`arreri allura e aiutu chiama:
- Lu corpu d`u Maistru n`arrubbaru...!
Petru cu n`àutru `i cursa s`avviaru
e lu sepulcru vacanti truvaru.
Vidennu i fasci e lu sudariu, `i latu
`nta n`agnuni, vicinu a` sipultura,
caperu ch`Iddu avìa risuscitatu,
pi comu pridiceva la Scrittura.
A` Maddalena, fora chi chiancìa,
Cristu dumanna: - A cu` cerchi? Maria! -
II - L`ASCENSIONI
- Signuri, resta, fèrmati cu nuàtri,
si sta facennu sira, è già tramuntu! -
Quannu spartìu lu pani, fu a stu puntu
ca cunusceru lu Cumpagnu aggiuntu!
Poi vinni ancora e dissi: - Paci a vuàtri!
Fantàsima nun sugnu, `un vi turbati,
taliàti manu e pedi spirtusati;
tuccàtimi si ancora dubitati! -
Di poi versu Betània `i cunnucìu,
jisò li manu, dici lu Vangelu,
binidicennu d`iddi si spartìu,
lassò la terra e fu purtatu `nCelu.
Gesù adoratu, chi filicità
s`iddu pinsamu ca n`aspetti Ddà!
III - LA SCINNUTA D`U SPIRITU SANTU
- Vi mannu zoccu `u Patri mi prumisi,
stati a Gerusalemmi e `un vi nni jiti
ca na putenza supra a vui avirriti! -
`Nta chista attisa tutti i cori uniti.
Maria e li santi tutti eranu misi
`nt`o` stissu locu aggiuntati a prigari,
quannu si `ntisi d`u celu arrivari
un gran rumuri e un ventu calari.
Comu lingui di focu cumpareru
chi supra d`iddi s`àvanu pusannu,
doppu ca a una a una si sparteru.
Chiddi pàrranu lingui chi nun sannu!
Sunnu `mbriachi, quarcunu dicìa.
Signuri, fà `mbriacari puru a mia!
IV - L`ASSUNZIONE DI MARIA SS.
Matri di Gesù Cristu e criatura,
Virgini Immaculata, Veru Gìgghiu,
chi di `nterra, senza bàttiri cigghiu,
passasti anima e corpu cu to Fìgghiu,
a tia ni rivulgemu cu primura
quannu vulemu la liberazioni
d`un mali chi n`affligi o tintazioni,
a tia prigamu senza suggizioni.
`Nfatti sì tu la nostra matri vera,
di nuàtri piccatura l`Avvucata,
cu tia si fa cchiù duci ogni prighera,
tutta l`umanità ti resta grata.
Prega pi nuàtri c`àppimu sta sorti,
ora e `nta l`ura di la nostri morti!
V - L`INCURUNAZIONI DI MARIA SS.
L`ùmili serva fu fatta Riggina,
di li so figghi chiamata Biata
e, p`ogni suffirenza suppurtata,
tra l`àncili e li santi incurunata.
Vistuta `i suli `nt`o` Celu camina,
appoja li pedi supra a la luna,
dùdici stiddi havi `ntesta a curuna,
scàccia a lu serpi chi l`omu `mpurtuna.
A tia mi liga sta duci catina,
chistu Rusariu chi fa cuntimplari
la to biddizza e la Grazia Divina
chi scinni `nterra e stà dintra a l`Altari.
Riggina, Matri, Vìrgini Maria,
ti pregu `un ti scurdari mai di mia!
