LU PISCATURI SPORTIVU
(Fattu successu veramenti)
Lu sport chi cchiù assa mi piaci a mia
è propiamenti chiddu di piscari,
speci siddu mi pìgghia a lagnusia
afferru canna e lenza e vaiu a lu mari.
Mi mettu a cuncumeddu supra a un scògghiu,
squàgghiu `nta l`acqua un pocu di muddica,
un pocu `i sardi, picurinu e ogghiu
e aspettu u fruttu di la me fatica.
Però li pisci ormai su` smaliziati,
quannu vìdinu a mari st`abbunnanza
capìscinu ca forsi su aspittati
di cu` li voli mèttiri `nta panza.
Ammàtula ci mettu u filu finu,
sempri in suspettu fannu i schinfignusi.
Già mi scurò e vinni di matinu
ma unu nun l`afferru `i sti tignusi!
Chi fazzu? M`arricampu senza nenti,
senza mancu un mulettu nto` panaru?
E chi figura fazzu cu i parenti!?
No! Passu nn`o` Baruni, lu pisciaru,
ni pìgghiu quattru o cincu, ma scartati,
di chiddi propiu beddi, di valuri...
e i picciriddi su` tutti priati
d`aviri un patri veru piscaturi!
