LU JOCU DI LU LOTTU
(da "Egregiu Diretturi" Ed. LA BOTTEGA DI HEFESTO 1985)
C`è me nannu chi, mischinu,
quannu siggi la pinzioni,
si la joca o putighinu
picchì aspetta l`estrazioni.
Pi stu jocu malidittu
si `mpignò puru u brillanti,
mància sulu pani schittu,
notti e jornu prega a i santi!
Metti a tutti crucifissi,
si vinnìu li tabaccheri,
si quarcunu la vulissi
si vinnissi la muggheri!
Ci niscissi chistu ternu
pi quitari la famigghia!
La pinzioni, lu guvernu
comu `a duna si la pigghia!
Traduzione
Indietro
Powered by