VITA DI PUETA
Cu sta manìa chi haiu di puitari
mi scordu d`accattari lu manciari.
Nèsciri e fari t`anticchiedda `i spisa
pi mia è comu còmpiri `na `mprisa.
Mi piaci sulu scrìviri ballati,
sunetti, giambi e versi strampallati.
A menzujornu a tavula è cunzata,
ma manca u pani e puru la `nsalata.
E iu, chi p`u pitittu nun staiu addritta,
pigghiu na puisia e la fazzu fritta.
Pi digistivu mi vivu un sunettu
e doppu mi va` curcu `nta lu lettu.
Quannu mi susu staiu peggiu di prima:
chista è la vita quannu piaci a rima!
