LU SESSU E LI VICCHIAREDDI
Ma cu lu dissi ca li vicchiareddi
nun hannu cchiù l`attività sessuali!?
Ci nn`è chi su` cchiù vispi d`i fringueddi,
chi sunnu giovanotti tali e quali.
Pi esempiu, c`è me nannu, a novant`anni,
chi nn`ha canciatu tri di cammareri,
picchì, cu tutti `i acciacchi e li malanni,
ci duna pizzicuna `nto darreri.
Iddu nni dici ca `un lu fà pi mali,
ma ch`è na speci i tic, di riflessu,
pi esprìmiri la so forza vitali.
Pi chistu nun lu chiedi lu permessu.
Me nanna fà scinati `i gilusia:
si pitta l`occhi, si fà cchiù attraenti
di modu ca u maritu la talìa.
Ma pi la gatta nun ci nesci nenti:
Me nannu `nfatti si muntò la testa
pi na subretti di televisoni
e nun voli ca nuddu lu mulesta
si affàccia `nta lu vìdiu a so` passioni!
Ora com`è ca si po` ghiri avanti
quann`unu cu l`età nun si rassigna!?
Avìssiru a prigari a Diu e a li santi
si` un hannu cchiù capiddi `nta la tigna...
E `nveci chi ci spercia? Lu ballittu,
li fìmmini chi fannu `u spogliarellu...
Un tempu parìa assai lu pani schittu
e oggi pari picca u rafanellu!
`Nta st`èpuca moderna, tutti cosi
mi pari ca s`avìssiru `nvirtutu:
sunnu i picciotti amanti d`i riposi
e si strapazza `nveci lu canutu!
