LA PROTISI DI LA VIRILITA`
(dal Giornale di Sicilia del 18/9/1987 - dopo un congresso di urologia)
Vecchi! Nun dispirati
siddu, a una certa età,
pirdìti i nnammurati
e la virilità:
ora pi l`imputenza
ci sta pinsannu a scienza!
Na pocu di scinziati
si riunèru ccà
purtannu ritruvati
di granni qualità!
Cu vera cumpitenza
dèttiru sta sintenza:
"L`òrganu `un funzionanti,
pi età o pi malatia,
muntànnucci un pursanti
diventa artigghieria;
basta un`operazioni
e avveni l`erezioni"!
Fà passi di giganti
la nova chirurgia;
sarannu i vecchi, amanti
senza malincunia,
e avrannu munizioni
senza limitazioni!
Chistu novu apparecchiu,
funziona cu a prissioni,
duna davanti o` specchiu
la so` suddisfazioni;
è garantitu l`usu,
basta nun fari abusu!
Usànnulu parecchiu,
senza muderazioni,
po capitari a un vecchiu
`na brutta situazioni:
infatti nun è esclusu
ca scòppia e resta fusu!
