MA CHI BRUTTI NUTIZI!
(dal Giornale di Sicilia del 7/7/1984)
Egregiu Diretturi, havi a sapiri
ca me mugghieri, fìmmina di casa,
sparagnatrici sempri a mai finiri,
pi allustrari li vitra s`è pirsuasa
di usari lu giurnali addimuratu;
ma ormai havi d`un tempu a chista banna
ca lu cristallu assai resta `ngrasciatu.
E cchiù si pulizia, cchiù assai s`appanna.
Chi fùssiru pi casu li nutizi
chi sunnu tra li pagini stampati?
Mi pari un ripirtoriu di li vizi,
li cchiù fitusi, li cchiù scillirati!
Ci trovu scrittu: droga, ammazzatini,
furti, scippi, pulitici currutti...
Chistu li scannalìa a li citatini,
chi dìcinu: - Accussì semu arriddutti!? -
Nun fussi bonu, almenu `na facciata,
chi dicu... `na culonna, dedicari
a na nutizia, puru si `nvintata,
ma bona... pi li vitra puliziari!?
