L` AMURI RIFIUTATU
Siddu hai un nimicu chi ti voli mali,
chi ti `nciurìa e chi ti odia a morti,
rammèntati, a stu puntu, nenti vali
si ci fai aggùriu di la stissa sorti.
La morti, a` voti, è un midicinali,
d`un gran duluri è l`allèviu forti,
mentri l`amuri è pena `nfirnali
si trova chiusi tutti li so` porti.
Pi chistu u malaggùriu cchiù putenti
è aviri un granni amuri rifiutatu,
misu di latu, valutatu nenti.
Tristi è lu nnammuratu disprizzatu,
ca nun c`è straziu e pena cchiù dulenti
d`amari senza essiri riamatu!
