EFFETTU CERNOBYL
`Sti radiazioni atòmichi
pari ca `un fannu nenti...!
A mia sai chi mi fìciru?
... Sugnu fusfuriscenti!
Iu vitti ca spugghiànnumi
`nta càmmara, a lu scuru,
comu na lampa illùminu
lu tettu e puru u muru!
A lu spitali dìcinu
ch`è cosa passiggera,
anzi a bulletta elettrica
la pagu cchiù liggera!
Ma a mia nun mi cunvìncinu,
iu vogghiu riturnari
com`era prima, semprici,
normali e naturali.
La notti `un pozzu dòrmiri:
mi dugnu timpuluna,
picchì c`u lustru vèninu
muschitti e zappagghiuna.
Però già mi prumìsiru,
si nun finisciu mali,
un postu di Cumeta
`nta l`àrbulu `i Natali!
