L`INSERZIONI
Liggivu `nta u giurnali un`inserzioni
chi sunava, cchiù o menu, d`accussì:
"Brava massaggiatrici fà lezioni,
ricivi tutti i jorna doppu i trì."
Vulennu irrobustìrimi a carina
ci jivu u jornu stissu pi pruvari.
Cari signuri mei, atru chi schina,
a quattru pedi mi n`appi a scappari!
Chiddu era un postu pi la pirdizioni,
d`unni t`alleggirìscinu a sacchetta!
Mi prisintai cu tanta educazioni,
cu a cassa malatia e cu la ricetta,
e nmenzu a tutta dda gran cunfusioni
ci appizzavu macari na quasetta!
