LI PUPI
Quannu a lu mastru chi facìa li pupi
ci capitava un lignu troppu duru,
diciva: "Chistu è bonu pi li scupi...!"
e lu jittava `nta na `gnuni `i muru.
Ma si lu lignu inveci si pristava
e era chidda giusta la durizza,
cu l`àscia e lu scarpeddu lu `ntagghiava
e ni faceva un`opra di biddizza.
Nascèvanu accussì li paladini:
Rinaldu, Orlandu, draghi di lu `nfernu,
turchi, cavaddi, prìncipi e riggini!
Si u lignu era purritu `nta l`internu,
diciva: "Nun lu jettu, ca a la fini
ci pozzu fari un capu di guvernu!"
