LA PUISIA DI NATALI
La puisia cchiù vera
la fici lu Signuri,
la scrissi quasi du` millenni fa`
e la chiamò: Natali!
L`aviva cuncipita già di l`eternità.
La scrissi `nta na notti
fridda ma china `i stiddi;
dintra na stadda pòvira
chi addivintò na règgia;
quannu u silenziu `i l`òmini fu tali
ca si sintìanu l`ancili cantari.
La puisia cchiù duci, lu Signuri
ni la vosi purtari pi signali
di l`Infinitu Amuri.
La fici accussì chiara
ca l`occhi di lu voi e d`u sciccareddu,
di nìvuri e astutati,
addivintaru lustri
taliannu u Bammineddu!
La puisia cchiù granni, lu Signuri,
la vosi fari pi li puvireddi,
pi li malati, pi li picciriddi,
pi chiddi senza curpa `ncarcirati,
pi l`emigrati,
p`i vecchi abbannunati,
pi chiddi chi la notti
talìanu li stiddi,
sèntinu a vuci `i l`àncili
cu l`oricchi di l`anima
e hannu u cori chinu di firiti
chi mentri batti dici:
Paci, Paci!
