U PRISEPIU
(Dal Giornale di Sicilia del 14/12/1986)
In ogni casa, prima di Natali,
di fari lu prisèpiu c`è l`usanza:
è un signu `i divuzioni spirituali
e `nsémmula un missaggiu di spiranza.
Si méttinu i pastura cu l`armali,
si fà la grutta, c`havi la simbianza
di chidda stadda, vera e naturali,
unni nascìu na vota a Fratillanza!
Ci sunnu l`ancileddi, lu viteddu
chi `nsémmula a lu sceccu fà caluri
pi nun sèntiri friddu u Bammineddu.
La stidda cu la cuda fà splinduri
supra a stu munnu, ancora puvireddu,
in cerca di la Paci e di l`Amuri!
