LU FISTINU OGGI
XXX Canto da
Ogn`annu c`è `n Palermu lu Fistinu,
fattu a tistimunianza di l`amuri
ca, ancòra `nta cità, ogni citatinu
porta a la Santa pi lu gran favuri.
Ci su li "botti", c`è la prucissioni,
prigheri cu firvuri e divuzioni!
Passa la "Vara" cu l`urna d`argentu
pi u Càssaru e li strati illuminati...
la pesti fu guarita, ma un turmentu
ancòra ccà camina strati strati:
chidda pesti finìu, ma n`àutru mali
c`è cchiù pisanti. E un sèrvinu spitali!
La pesti canciò nomi... è cchiù viulenta,
nun s`accuntenta cchiù d`a vita umana,
ora l`anima scippa! Ni turmenta,
cu milli tintazioni n`arruffiana!
Canciò lu nomi pi nun si scupriri,
ma u stissu a tanta genti fà muriri.
Vinni vilenu a i pòviri `nnuccenti,
minaccia, spara e ammazza pi la via
e misi tanti ràdichi pussenti
ca sulu veru un santu ci purrìa.
Su` sempri chini `i sangu li balati
e senza morti `un pàssanu jurnati!
Su` ràdichi chiantati `nta `gnuranza,
`nta la miseria e a disoccupazioni,
`nta l`egoismu i l`omini e a mancanza
di cu` guverna senza azioni boni!
Iu, quannu è lu fistinu, una prighera
la dicu `nta na `gnuni, ma sincera.
Ci dicu: "Santa, ma picchì nun senti,
picchì n`abbannunasti `nta li manu
d`omini senza amuri?! Ccà la genti
nun sapi cchiù zocch`è campari umanu!
Fà ca ogni cori arreri dici a tia:
- Viva Palermu e Santa Rusulia! -
