PI LU ME PINSIUNAMENTU
(Lu 10 di uttubri 2007 è l`urtimu jornu di sirviziu)
Colleghi e amici cari di la Posta,
a tutti vi salutu: vaiu in pinsioni.
Ci vaiu pi l`anni e nun lu fazzu apposta,
insumma... mi nni mànnanu cu i boni!
Quannu trasivu havia la facci tosta,
tanti spiranzi e un pocu d`ambizioni,
pi ognunu prontu havia botta e risposta
e lu travàgghiu `un mi facìa `mprissioni.
Ora li spaddi un pocu s`incurvaru,
l`occhi pirderu quarchi gradu `i vista,
na pocu d`illusioni s`affumaru.
Però nuddu pinseru mi rattrista,
pi quantu u sangu mi l`haiu fattu amaru,
mi resta a Fidi in Diu comu cunquista!
