COMPUTERS E MISS
(Dal Giornale di Sicilia del 08/07/1985)
Li cuncursi di biddizza
nun su` cchiù comu a `na vota:
di la facci e di finizza
nun si pigghia mancu nota.
Ora `i Miss sunnu eletti
cu strumenti `i precisioni
chi ci scòprinu i difetti
e ci fannu `a selezioni:
Tutti quanti li misuri
prestu su` `mmagazzinati
dintra a l`elaboraturi
prugrammatu di scinziati.
Pettu, natichi e bacinu,
spaddi, cosci, coddu e testa...
e lu "ciriveddu finu"
la cchiù bedda manifesta!
Forsi sugnu troppu anticu...
ma `sta granni precisioni,
chi fà cuntu d`u viddicu,
teni cuntu `i l`espressioni?!
