LA BENZINA
(Dal Giornale di Sicilia del 8/10/1985)
Comu u dòllaru a benzina
cala un jornu e n`autru jisa;
siddu vuoi la tanga china
nun sai quantu veni a spisa!
Oggi scala cincu liri
e dumani acchiana vinti.
Lu picchì `un si po sapiri...
nui nun semu mai cunvinti!
Pari ca nni u benzinaru
ni livàssiru li pinni...
sempri cchiù mi pari avaru:
"Oggi quantu mi nni vinni?"
Si `un facissi lu pueta
e facissi lu scinziatu,
lu problema `i stu pianeta
già l`avissi spirugghiatu:
Una machina facissi
chi camina cu l`urina,
d`accussi ciascunu avissi
la sò tanga bella china!
Ma però haiu l`impressioni
ca nun la passassi liscia:
lu guvernu, a l`occasioni,
ni tassassi puru a piscia!
