CHIOVI `NPALERMU
(21/10/2007)
Palermu è organizzata pi la `stati,
pi chistu quannu chiovi è `na jattura.
Veni lu `nvernu, vennu li jurnati
chi fannu d`a cità `na fugnatura!
Pantani e ciumi pàrinu li strati
e nèsciri di casa è n`avvintura:
cròllanu mura, càdinu balati
(però, in cumpensu, l`aria si fà pura)!
Una cità ch`è tutta un munumentu
abbannunata o tempu e a la natura,
a li crapicci chi fà l`acqua e u ventu!
Ma nuddu la difenni `sta criatura?
Putissi armenu chistu me lamentu
scòtiri lu Cumuni e a Prifittura!
