QUANNU SI GRAPI LA CACCIA
(Dal Giornale di Sicilia del 2/9/1986)
Ogni annu, a l`apirtura di la caccia,
un esercitu c`è di cacciatura
ca, cu li cani, séguinu la traccia
di l`armaluzzi c`hannu sta svintura.
Doppu di lu palluni chistu è
lu sport chi appassiuna a cu è gghiè!
Bardati cu scupetti e cinturuna,
giubotti villutati e cartucceri,
birritta supra a testa e stivaluna
(ca `nveci ci arripàranu li peri),
pàrtinu di matina a l`avvintura
li veri appassiunati d`a natura!
`Nta li campagni c`è lu scappa scappa;
si `nfilanu i cunigghi `nta li tani,
a ogni armali a peddi ci s`arrappa
a séntiri u latratu di li cani.
(Li besti pi `gnuranza e cudardìa
nun sannu chi vol diri eculugìa)!
A sira s`arricampanu sfinuti
chistu surdati di "la granni armata",
cu dintra a lu carneri du` pinnuti,
un surci e na giurana già spiddata:
"la sarvaggina è scarsa a stu mumentu
pi curpa di lu troppu inquinamentu!".
