L`APIRTURA DI LI SCOLI
(Dal Giornale di Sicilia del 20/10/1986)
Quannu ràpinu li scoli
c`è `nta i strati lu scialari,
la matina, di figghioli
cu li libra pi studiari:
Bicicletti e motorini,
picciriddi cu i nastrini.
Li cchiù nichi cu la matri,
li cchiù granni, cu lu ngrizzu,
cu carpetti, righi e squatri
spissu sbagghianu indirizzu:
si lu tempu `un è turbatu
si nni vannu `i n`àutru latu!
Quannu sona u campanellu,
picchì `i tràsiri è già l`ura,
pi nun pèrdiri l`appellu,
c`è cu curri cu primura.
C`è cu còmmira la pigghia
picchì ancora `un s`arruspigghia!
Picciutteddi, lu studiari
vi fa jiri cchiù luntanu!
Iu, pi jiri a passiari,
scrivu sulu in sicilianu:
ogni jornu, cu la zita,
mi nni jiava a Favorita!
