PALAZZU DI L`AVVOLTOI
(Dal Giornale di Sicilia del 19/02/1988)
Palermu filicissima,
di l`arti gran tisoru,
riggina d`a Sicilia
e di la Conca d`Oru,
havi un palazzu granni:
Palazzu d`i Nurmanni!
Ddocu si riunìscinu
li nostri deputati,
fannu li liggi e sòffrinu
pi nuatri li piccati.
Lu pòpulu, `gnuranti,
nun sapi ca su` santi!
Nun sulu, ma pi sfùttiri,
fannu lu paraguni
cu lu "Palazzu `i l`àquili",
(ch`è chiddu d`u Cumuni),
e `ncoru sta puisia
càntanu a litania:
Sàpiti comu chiàmasi
stu gran palazzu anticu,
d`unni, u guvernu `i l`Isula,
o` pòpulu nimicu,
lassa `nta li catòi?:
"Palazzu `i l`avvultoi!".
