NATALI (1986)
(Dal Giornale di Sicilia del 24/12/1986)
Veni Natali...
comu ogn`annu veni
purtànnuni na stizza di spiranza.
Lu Verbu si fà carni
e comu l`omu
si carrica la cruci supra a i spaddi.
Dintra a na grutta
nasci lu Bamminu...
pi tutti nasci:
pi li carcirati,
pi li putenti,
p`i sani e li malati,
pi chiddi ricchi
e chiddi senza nenti!
L`àncili
(chi ci su` e nun li videmu)
càntanu gloria a Diu.
Nun li sintemu
pi lu fracassu chi fà tanta genti!
Ma si pruvamu,
dicu na vota sula
(st`annu siddu vulemu),
a l`occhi e `aricchi
chiùdiri a lu munnu
e a gràpiri `nto cori `na fissura,
ma nica...
nica-nica pi un minutu,
Natali veni...
veni veramenti!
La musica di l`àncili si senti
e `un la scurdamu cchiù
pi tutta `a vita!
