LU MAGU
Qual`è la me passioni? La magia!
Com`è ca fazzu? E` un donu naturali,
si mi cuncentru, sciògghiu `a magaria
e libiru la genti d`ogni mali!
Ni mia vennu cristiani d`ogni tipu:
cu voli u filtru pi lu nnammuratu
(ni tegnu litra dintra a lu me stipu)
e cu` nun voli pàrtiri surdatu!
La luna, `i stiddi e tuttu `u firmamentu,
lu dicu senza tèmiri smintita,
pi mia su` un libru apertu e `nta un mumentu
fazzu la privisioni pi ogni zita!
Aviti picciriddi di guariri?
Siti gilusi? Circati occupazioni?
Vuliti la ricetta pi arricchiri?
...Viniti! Nun aviti esitazioni!
Badati, sugnu un magu autorizzatu.
No, comu a tanti, senza la licenza!
Pagu li tassi, pagu `u sinnacatu
e `a cassa malatia pi l`assistenza!
Picchì `nt`a vita, `un si po` mai sapiri,
puru a li maghi càpita `i falliri!
