ROSA
25 gennaio 2008
Quantu si` bedda, gioia di lu me` cori,
iu ti lu dicu ccà cu stu sunettu,
incunucchiannu `sti quattru palori
chi `un ponnu stari cchiù dintra lu pettu!
Cu `st`occhi e cu `sta vucca mi ristori,
li to` capiddi su` lu me` dilettu,
puru la fantasia cu tia mi mori
si cercu di truvàriti un difettu.
Lu veru nomi to` è "duci amuri",
picchì cu ama a tia nun è mai afflittu,
sempri cantannu è di bon umuri
e, puru si havi sulu pani schittu,
riccu si senti comu un gran signuri.
Rosa, si nun nascevi era un delittu!
