OCCHI CHI S‘ ASTUTANU
Dunami aiutu tu, matruzza mia,
‘na benna niura mi cadiu davanti
Sentu la vuci ma nun vidu a tia
Chi a li me peri parri cu li Santi.
Sfarda stu velu chi mi marturia,
cunnucimi cu tia sempri chiù avanti,
‘nzigna a sta manu all’aria chi tantia
Unni finisci tuttu stu vacanti!
O luci luci, unn’è ca si ‘nfilata?
Fammi l’ultima vota taliari
Sta vicchiaredda bona e sfurtunata.
Matri! Nun cc’è chiù nennti di spirari,
io Cristu ‘ncruci e tu l’Addulurata,
chistu è lu dramma chi nni tocca fari!
NOTA
Questa poesia fu presentata da Salvatore Equizzi ad un concorso bandito dal giornale “Po’ t’ù cuntu!†e vinse una coppa d’argento.
