M`aveva scrittu `u mèdicu, picchì sugnu nirbusu, una partita `i pìnnuli cu l`istruzioni d`usu. A mia, prima `i curcàrimi, secunnu la ricetta, pi dòrmiri pacìficu bastava `na cunfetta. Ma in farmacia mi dèttiru, pi sbàgghiu iu suspettu, cu `a scritta: "Made in USA", di pìnnuli un tubettu. Mi cunsumai! `Sta pìnnula appena mi l`agghiuttu mi sversa u ciriveddu, diventu propiu bruttu! Si provu a addummiscìrimi mi vennu li visioni di provocanti fìmmini cu milli tintazioni! A la tivvù a svagàrimi mi staiu na para d`uri: è antica, in biancu e nìvuru, però la viju a culuri! Spunta `a prisintatrici, affàbili signura, `nta manu havi `u nicròfunu, p`u restu è tutta nura! Senza pigghiari alcòlici, mbriacu già mi sentu, cercu di ripigghiàrimi rispiru quasi a stentu. Visti li risurtati v`à lèggiu l`istruzioni. Mi vennu i quaranati... tricentu di prissioni! Autru chi carmanti! La pìnnula sirvìa pi cu`è... troppu carmu! Insumma... no pi mia!
|
|